Gipamalandongan ni Archbishop Emeritus Most Rev. Jose Palma ang mga milabay nga kalamidad sa Sugbo, diin iyang gihisgutan nga kini nakapahugot pa sa pagtuo sa mga Kristohanon sa lalawigan.
Sa usa ka eksklusibong pakighinabi sa Bombo Radyo Cebu News Team, giingon ni Arsobispo Palma nga bisan pa sa mga hagit nga nasinati sa mga Sugboanon, nagpabilin gihapon nga lig-on ang ilang pagtuo.
Giila pa niya nga mas napakita kini pinaagi sa mga maayong buhat sa katawhan.
Gihatag niyang pananglitan ang kahimtang human sa Magnitude 6.9 nga linog sa Dakbayan sa Bogo.
Tungod sa kadaghan sa mga gustong motabang sa nabiktima sa linog, nahimong hinungdan kini sa grabe nga trapiko sa lugar—usa ka pamatuod sa kadasig ug pagkahugot sa kasingkasing sa mga Sugboanon alang sa ilang isigkatawo.
Sa okasyon sa kapistahan sa Balaang Bata, Señor Sto. Niño de Cebu, mipadayag si Arsobispo Palma nga ang panaghiusa ug maayong panaghinigsuonay ang angay hatagan ug luna sa mga Sugboanon karong selebrasyon.
