Priyoridad sa Philippine Air Force ang kaluwasan sa duha ka piloto nga sakay sa nawala nga FA-50 fighter jet, kagahapon, Marso 4, 2025.
Kini ang gipaambit ni Col. Maria Consuelo Castillo, ang tigpamaba sa Philippine Air Force atol sa pakighinabi sa Bombo Radyo Cebu.
Matod niya nga dili pa sila makapagawas sa ubang mga detalye kalabot sa ilang search and rescue operation, apan aduna na silay general area nga gisusi karon aron masiguro nga ang mga rescuer maoy unang makakita sa mga piloto ug mahatagan dayon og tabang.
Gawas nga marekober ang fighter jet, nanghinaot sila nga makit-an ang duha ka piloto, isip mga survivors.
Dugang ni Col. Castillo nga dako og tabang ang personal locator beacon, usa ka personal equipment sa mga piloto nga anaa sa ilang mga uniporme nga adunay senyales nga ‘manually activated’, hinungdan nga aduna na silay gitan-aw ang general area diin posibleng makita ang duha ka piloto nga sakay sa missing aircraft.
Sa laing bahin, naka-alerto ang buhatan sa Cebu Provincial Disaster Risk Reduction and Management Office sa posibilidad nga moagi sa Area of Responsibility sa Probinsya sa Sugbo ang mga nawala nga ayroplano.
Kini maoy gibutyag ni Welson Ramos, ang head sa Cebu Provincial Disaster Risk Reduction and Management Office.
Matod niya nga gikontak sila sa Lapu-Lapu City Disaster Risk Reduction & Management Office ug mihatag og impormasyon nga nanawag kanila ang mga awtoridad sa Mindanao diin dako ang posibilidad nga moagi sa Probinsiya sa Sugbo ang nawala nga FA-50 fighter jet.
Gumikan niini, naalarma na ang tanang mga personahe sa DRRMO sa tibuok Probinsya sa Sugbo, inubanan sa pahimangno nga kung makadawat sila og sighting report sa mga aircraft kay mahimong i-report dayon sa ilang buhatan alang sa tukmang aksyon.
