CEBU– Nagmaya apan “kalma” lang ang kabanay hilabi na ang inahan ni Margielyn Didal sa Brgy. Lahug dakbayan sa Sugbo human nga nabulsa sa iyang anak ang gold medal sa womens Skateboarding competition sa 2018 Asian Games.
Sa ekslusibong pakighinabi sa Bombo Radyo Cebu sa inahan ni Margielyn nga si Julie Didal, nagkanayon kini nga gipakalma niya ang iyang kaugalingon sa kalampusan sa anak gumikan kay aduna siya’y highblood basin atakihon pa siya.
Saysay sa inahan ni Margielyn nga kani-adto pa hilig na ang iyang anak sa skateboarding.
Apan dili gusto ang iyang asawa nga amahan ni Margielyn.
Ni-abot matod pa sa punto nga giguba ug gilabay pa sa amahan niini ang skateboard ni Margielyn sa bukid gumikan kay wala kini naka-uyon sa sports nga nagustohan sa anak.
Nabali matod pa ang ngipon niini kani-adto ug nagka-injury pa sa pa-a hinungdan nga dili gusto sa amahan niini ang skateboarding.
Apan sa kadugayan, nakita matod nila ang potential sa anak hinungdan nga gisuporta-an na nila kini sa mga gi-adtuan ug gisalmutan nga competition.
Klaro nga gipugngan sa inahan niini ang tumang kalipay ug nagkomedya pa kini nga kinahanglan niya’ng mukalma basin dili niya matilawan ang daug sa anak kung atakehon siya.
Si Margielyn, ang ika-upat sa lima ka managsuon.Naninda usab matod pa og newspaper ug tempura usahay magdispatcher usab.
Una na’ng gibutyag ni Margielyn nga ugaling makuha niini ang gold medal sa 2018 Asian Games magsugod siya og negusyo.
