Gipadayag ni kanhi U.S. Vice President Kamala Harris nga posible siyang modagan pag-usab sa pagka-presidente sa 2028, bisan wala pa siyay katapusang desisyon.
Sa usa ka miting sa National Action Network sa New York City, direktang gipangutana si Harris kung plano ba niya nga modagan pag-usab sa pagka-presidente, diin gitubag niya kini nga “possible” ug gisundan dayon kini og lanog nga pakpak.
Gidugang ni Harris nga iyang tagdon ang desisyon basi sa kung kinsa ang labing maayo nga mangulo sa katawhang Amerikano sa 2028.
Si Harris, kinsa nagserbisyo isip bise presidente ubos sa kanhi Presidente sa Estados Unidos nga si Joe Biden, napildi sa eleksyon sa pagka-presidente sa 2024 kang Donald Trump, kinsa midaog sa popular vote ug sa Electoral College.
Sa wala pa mahimong bise presidente, si Harris nagsilbi usab nga senador sa Estados Unidos ug attorney general sa California, ug kaniadto midagan siya alang sa nominasyon sa pagka-presidente sa mga Demokratiko niadtong 2020.
Sumala sa mga tigpaniid sa politika, ang pagdagan pag-usab mahimong usa ka hagit alang kaniya tungod sa mga panawagan gikan sa pipila ka mga botante nga gikinahanglan ang bag-ong liderato sa Partido Demokratiko human sa iyang kapildihan niadtong 2024.
Mitambong usab sa panagtapok ang daghang mga potensyal nga kandidato sa 2028 sama nila ni Gobernador Josh Shapiro sa Pennsylvania, kanhi Kalihim sa Transportasyon nga si Pete Buttigieg, ug Gobernador JB Pritzker sa Illinois.
