Napili sa House of Representatives ang tulo ka mga magbabalaod nga sila si Pangasinan Rep. Maria Rachel Arenas, Cebu Rep. Vincent Franco Frasco, ug Bacolod City Rep. Alfredo Benitez isip bag-ong Deputy Speakers.
Atol sa sesyon niadtong Miyerkules, si Majority Floor Leader Ferdinand Alexander Marcos mitindog aron nominahon ang tulo isip bag-ong deputy speakers. Diin ang mosyon giaprobahan ni Speaker Faustino “Bojie” Dy III, kinsa maoy nangulo sa sesyon.
Si Frasco usa ka kanhi deputy speaker, atol sa 19th Congress sa panahon ni kanhi Speaker Ferdinand Martin Romualdez.
Wala na siya napili isip deputy speaker atol sa 20th Congress tungod kay midumili siya sa pagpirma sa manifesto sa suporta kang Romualdez, tungod sa pagtuo nga ang kamara nagkinahanglan og nagkahiusang liderato.
Sa pagsugod sa sesyon sa 20th Congress niadtong Hulyo 2025, si Frasco – uban ni Benitez ug Navotas Rep. Toby Tiangco, nakahukom nga dili mobotar kang Romualdez, nga nagpasabot nga dili sila mahimong kabahin sa Mayorya.
