Gikuwestiyon sa kampo ni Duterte ang giladmon ug kamatuoran sa mga ebidensya nga gipresentar sa prosekusyon, ilabi na ang mga pasangil nga widespread o systematic nga pagpamatay sa Davao City.
Atol sa hearing, hugot nga gihimakak sa abogado sa depensa ang mga pasangil, nga nagpunting nga ang Count 1 sa kaso naglangkob lamang sa siyam ka insidente sa pagpamatay sa usa ka siyudad.
Gitubag usab sa depensa ang mga pahayag sa representante sa prosekusyon, si Ms. Robin Kraft, kinsa naglambigit sa usa ka quarry site isip giingong mass grave.
Sumala sa depensa, ang mga awtoridad sa Pilipinas adunay igong panahon ug oportunidad sa pagpahigayon og lawom nga imbestigasyon sukad nga gibalik ang judicial warrant, apan wala kini makahatag og bisan unsang lig-on nga ebidensya.
Gitumbok sa depensa, nga ang bugtong basehan nga gigamit sa prosekusyon sa nahisgutang isyu mao ang pahayag ni kanhi Senador Leila de Lima ngadto sa usa ka Senate Committee.
Kini may kalabotan sa pagkadiskobre sa pipila ka mga patayng lawas sa tawo nga mahimong iya sa mga sundalong Hapones atol sa Ikaduhang Gubat sa Kalibutan, ug dili gikan sa mga biktima sa giingong extrajudicial killings.
Gisaway usab sa abogado ang pamahayag sa laing saksi nga nag-ingon nga ang mga patayng lawas gilabay sa kadagatan sa Davao, nga gihulagway sa depensa nga usa ka katingad-an nga pag-angkon o kadudahang alegasyon.
Giinsistir sa depensa nga bisan kung susihon ang tibuok gulpo, walay nakit-ang ebidensya aron pamatud-an ang maong mga alegasyon.
