Nagsang-at og notice of appeal sa Appeals Chamber sa International Criminal Court (ICC) ang kampo ni kanhi Presidente Rodrigo Duterte aron balihon ang desisyon sa Appeals Chamber nga isalikway ang interim release sa kanhi Presidente.
Sa unom ka pahina nga dokumento nga gipetsahan og Enero 28 nga gisumite sa kampo ni Duterte, ilang gihangyo ang iyang diha-diha nga interim release, ubos sa mga kondisyon nga mahimong ipatuman sa usa ka state party sa international court.
Gipahayag sa kampo sa kanhi Presidente nga ang Pre-Trial Chamber I nasayop sa wala pagkonsiderar sa medical report nga ilang gisumiter.
Sumala kanila, ang medical report klaro nga nag-ingon sa daw padayon nga pagkadaot sa panglawas ug cognitive condition sa kanhi presidente.
Dugang nga giingon sa kampo ni Duterte nga ang Pre-Trial Chamber I obligado nga tagdon ang maong report sa regular nga pagrepaso niini kung gikinahanglan pa ba ang padayon nga pagbilanggo ni Duterte sa The Hague.
Niadtong Enero 26, ang Pre-Trial Chamber I mihukom nga adunay igo nga ebidensya nga si Duterte mahimo gihapon nga makahimo og mga krimen sulod sa hurisdiksyon sa ICC.
Sa samang adlaw, nakita usab sa chamber nga si Duterte takos nga moapil sa mga pre-trial proceedings nga may kalabotan sa kaso sa crimes against humanities nga nalambigit sa kamatayon sa liboan ka mga Pilipino tungod sa iyang kampanya batok sa ilegal nga droga sa dihang siya ang mayor sa Davao City ug presidente sa Pilipinas.
Gibalibaran usab sa ICC ang hangyo ni Duterte alang sa usa ka walay tino nga pag-adjourn.
Samtang, gitakda sa korte ang pagsugod sa pagkumpirma ni Duterte sa mga kaso sa Pebrero 23, 2026.
