CEBU CITY- Gipanghimakak sa kampo ni Police Lieutenant Colonel Alfredo D. Padilla Jr. nga adunay kalabotan o nagtugot siya nga gamiton ang iyang pangalan sa usa ka “manifesto” nga nagsuporta sa 18 ka kanhing miyembro sa Marines nga gipatik ug mikatap sa social media.
Sa eksklusibong pakighinabi sa Bombo Radyo Cebu, giklaro ni Atty. Rameses Victorious Villagonzalo, legal counsel ni Lt. Col. Padilla, nga wala’y bisan kinsa nga nangayo og permiso sa iyang kliyente aron gamiton ang iyang ngalan.
Dugang pa niya, wala usab mahibalo si Padilla nga nalakip diay ang iyang pangalan sa listahan nga nagpakita og suporta sa usa ka politikal nga isyu.
Tungod niini, nagpagawas og opisyal nga disclaimer ang kampo sa opisyal aron maprotektahan ang iyang ngalan ug reputasyon, ilabi na nga anaa pa kini sa active service.
Sumala sa abogado, ang pag-apil sa partisan political activity usa ka seryosong paglapas o grave misconduct, ilabi na sa mga miyembro sa uniformed service nga gikinahanglan magpabiling non-partisan ug malikayan ang direktang pag-apil sa politika.
Matud pa niya, kung mapamatud-an nga nalambigit sa partisan activity ang usa ka opisyal sa armed services, mahimo kini nga basehan sa dismissal gikan sa serbisyo.
Sa pangutana kon adunay legal nga aksyon batok sa mga naglakip sa iyang ngalan sa manifesto, giingon ni Villagonzalo nga sa pagkakaron wala pa sila’y gihimong pormal nga lakang.
Apan, nagplano ang iyang kliyente nga magpadala og mensahe ngadto sa opisyal nga Facebook page sa Chief PNP aron ipahibalo nga wala siya’y kalambigitan sa maong listahan ug nga gidugang lamang ang iyang pangalan nga wala siya mahibalo.
Samtang, gitan-aw pa sa kampo ni Padilla ang posibleng legal nga mga remedyo aron masiguro ang pagpanalipod sa iyang ngalan ug integridad sa serbisyo.
