Nanghinaot ug malaumon ang mga supporter ni Pinoy Olympian Ernest John “EJ” Obiena nga ang gipaabot nga dakong rally ug bagyo karong Septiyembre 21 dili makaapekto sa labing unang international pole vault event sa nasod, ang Atletang Ayala World Pole Vault Challenge, nga pangunahan sa labing taas Filipino vaulter.
Ang prestihiyosong kompetisyon ipahigayon sa Ayala Triangle Gardens sa Makati, diin gipaabot nga modagsa ang mga tumatan-aw aron masaksihan ang world-class nga kompetisyon sa pole vault, usa ka talagsaong kahigayonan sa kasaysayan sa mga sports sa Pilipinas.
Si Obiena makigsangka kauban ang walo ka world-ranked pole valters gikan sa lain-laing mga nasud, lakip ang:
🇺🇸 Austin Miller ug Matt Ludwig (USA)
🇫🇷 Thibaut Collet (France)
🇩🇪 Oleg Zernikel (Germany)
🇵🇱 Piotr Lisek (Poland)
🇹🇷 Ersu Sasma (Turkey)
🇧🇪 Ben Broeders (Belgium)
🇳🇱 Menno Vloon (Netherlands)
Bisan og adunay mga kabalaka nga maapektuhan ang dagan sa trapiko ug seguridad tungod sa dungan nga rally sa dakbayan, positibo gihapon ang mga fans nga hapsay ug luwas ang dagan sa kalihukan. Matod sa organizers, nakig-alayon na sila sa lokal nga kagamhanan ug mga awtoridad aron masiguro ang kahapsay sa palibot sa venue.
Ang World Pole Vault Challenge kabahin sa adbokasiya ni Obiena sa pagpataas sa lebel sa athletics sa nasud ug pagdasig sa mga batan-ong atleta. Gilauman usab nga maghatag ug dalan alang sa daghang internasyonal nga mga kalihokan sa palakasan sa Pilipinas sa umaabot.
