Nangayo og katin-awan ang Pasig Regional Trial Court Branch 159 sa kampo sa napriso nga founder sa KOJC nga si Pastor Apollo Quiboloy kalabot sa iyang recorded message nga gisibya sa unang adlaw sa proclamation rally sa Partido Demokratiko Pilipino (PDP) sa Ynares Sports Arena sa Pasig City.
Matud pa nga ang video gi-release sa wala pa ang korte nahatagan og higayon sa pagrepaso ug pag-aprobar niini.
Sumala sa korte, ang video gi-post usab kaniadtong Pebrero 10 sa Facebook nga wala’y pagtugot, nga usa ka klaro nga paglapas sa mga guidelines ug parameters nga gitakda sa korte.
Gihatagan sa korte og 5 ka adlaw ang kampo ni Quiboloy aron ipasabot ang maong butang.
Una nang mipasabot ang abogado ni Quiboloy nga si Atty. Israelito Torreon sa press briefing niadtong Martes nga gitugotan ang iyang kliyente sa pagpagawas sa iyang recorded message alang sa iyang pagka-senador atol sa proclamation rally taliwala sa mga akusasyon sa VIP treatment kang Quiboloy.
Sa pagkakaron, nag-atubang si Quiboloy og non-bailable qualified human trafficking charge sa korte sa Pasig ug nag-atubang og kasong child abuse ug sexual abuse sa Quezon City Regional Trial Court.
