Giabswelto sa Court of Appeals (CA) ang kaso ni kanhi Cebu Provincial Governor Gwendolyn Garcia sa misconduct charges niini kabahin sa pagmando sa pag-desilt sa suba sa Mananga sa dakbayan sa Talisay niadtong 2024.
Kini human ang CA mibali sa desisyon sa Office of the Ombudsman nga gipanulatan ni Associate Justice Raymond Lauigan kauban sa pag-uyon nilang Associate Justices Maria Elisa Sempio Diy and Ma. Consejo Gengos-Ignalaga sa Appellate Court 11th Division.
Sa maong desisyon, na-abswelto si Garcia human nasuta nga ang reklamanteng si Moises Deiparine napakyas sa pagpamatuod sa “wrongful and corrupt intention” ug naghisgot nga ang kanhi gobernadors kay mipalihok lang sa iyang emergency powers niadtong higayona.
Kahinumduman nga sayong bahin niadtong 2025 kay mipagawas og desisyon si kanhi Ombudsman Samuel Martires batok kang Garcia sa suspensyon sa opisina nga gibaylo sa unom ka buwan sweldong silot sa balor sa P1.2-milyones nunot sa mando niini sa pag-aprobar og permiso nga mag-desilting sa suba sa Mananga niadtong Mayo 2025 nga panahon sa kataas sa huwaw sa probinsya nga nakamugna og nahinit sa suplay sa tubig.
Giangkon kaniadtong sa Ombudsman nga si Garcia miisyu og special permit sa Shalom Construction nga walay clearance o pagtugot gikan sa Department of Environment and Natural Resources.
Apan ang CA kay misukwahi niini kay matod pa ang aksyon ni Garcia mamahimo lang nga nakalapas sa lagda sa balaod kung naglambigit kini og pagwari-wari sa panudlanan sa kagamhanan.
Niining kasoha, napamatud-an sa korte nga ang aksyon sa kanhi gobernadora kay wala nakaguba sa Mananga watershed pinaagi sa desilting niadtong panahona apan pag-alibyo lang kahuwaw nga nasinati sa probinysa.
