PROVINCE OF CEBU- Gihukman sa Office of the Ombudsman si kanhi Cebu Governor Gwendolyn Garcia nga sad-an sa ‘Conduct Prejudicial to the Best Interest of the Service’ ug Simple Neglect of Duty’ tungod sa pag-isyu og special permit alang sa river desilting nga walay gikinahanglang environmental clearance.
Sa desisyon nga pinetsahan og Hulyo 16, 2025, gimando sa Ombudsman nga silbihan ni Garcia ang usa ka tuig nga suspensiyon nga walay bayad.
Apan, tungod kay dili na opisyal sa gobyerno si Garcia sukad Hunyo 30, 2025, gisang-at sa Ombudsman nga ang silot nga suspensiyon ilisan og multa nga anaa sa unom ka bulan sa iyang batakang suweldo isip gobernador.
Kung diin, ang maong multa bayaran sa Opisina sa Ombudsman.
Kahinumduman, nga ang kaso naggikan sa reklamo nga gisang-at ni Moises Garcia Deiparine niadtong Abril 21, 2025, kalabot sa pag-isyu ni Garcia og ‘Special Permit No. 2024-09’ ngadto sa Shalom Construction, Inc. kaniadtong Mayo sa miaging tuig.
