Nipakita ang kanhi consultant ni Bamban Mayor Alice Guo nga si Nancy Gamo, aron ilimod ang mga taho nga ang tinuod nga inahan sa mayor usa ka Chinese national.
Matod ni Gamo, ang babaye nga gi-tag isip inahan ni Mayor Guo, si Lin Wen Yi, giingong kapikas lang sa iyang amahan ug usa sa mga incorporator sa iyang korporasyon.
Dugang pa ni Gamo, nga personal nga nakakita niini si Lin matag higayon nga mopirma siya sa articles of incorporation.
Gitumbok niini nga kapin sa 10 ka tuig na siya nga nagtrabaho ni Mayor Guo sukad niadtong 2012 may kalabotan sa mga transaksiyon sa negosyo bisan sa wala pa mapili si Guo nga mayor sa Bamban.
Iyahanng giklaro nga boluntaryo siyang mitunga ug wala gidiktahan sa kampo ni Mayor Guo.
Giingong andam usab siya nga motambong sa Senate hearing kalabot sa kaso sa mayor kon gikinahanglan.
Kahinumduman nga unang ginganlan ni Senador Sherwin Gatchalian ang usa ka “Lin Wen Yi” kinsa gipaila-ila isip inahan ni Guo sa Valenzuela City diin ang iyang pamilya kaniadto adunay negosyo.
Matod niya sukwahi kini sa testimonya sa mayor sa Bamban nga usa ka Filipino maid ang iyang inahan.
Gibutyag usab ni Sen. Risa Hontiveros kaniadtong Huwebes ang mga dokumento nagpakita nga si “Lin Wen Yi” nagpuyo sa parehas nga adres sa pamilya ni Mayor Guo.
