CEBU CITY- Gipahibalo sa Korte Suprema (SC) niadtong Miyerkules nga gipasakaan na og kasong administratiba ang usa ka retiradong mahistrado sa Court of Appeals (CA) tungod sa giingong bahin niini sa pagpatay sa usa ka abogado sa Sugbo niadtong 2020.
Ilang gimandoan si retired Court of Appeals Associate Justice Isaias Dicdican nga mopasaka og tubag sa kasong “gross misconduct” nga iyang giatubang tungod sa giingong kalambigitan niya sa pagpatay kang Atty. Joey Luis Wee.
Matod sa SC si Wee gipusil ug gipatay niadtong Nobyembre 23, 2020 sa ground floor sa building diin nahimutang ang iyang law office sa Cebu City.
“The SC directed Justice Dicdican to file an answer within a non-extendible period of 10 days from notice,” pamahayag ni SC Spokesperson Atty. Camille Ting.
Gidugang ni Ting, nga ang pension ni Dicdican mahimong ma-forfeit, kung siya mapamatud-an nga adunay administratibong tulubagon.
Ang mando sa korte miabot human sa memorandum ni Court Administrator Raul Villanueva nga pinetsahan Marso 25, 2025, nga pormal nga gipasakaan og kasong gross misconduct si Dicdican tungod sa giingong pagkalambigit niini sa pagpatay.
Usa si Dicdican sa mga gipasakaan sa kasong pagpatay nga gi-endorso sa National Bureau of Investigation (NBI) ngadto sa Cebu City Prosecution Office ug/o sa Office of the Prosecutor General.
Una niini, ang gunman nga si Fausto Edgar Peralta kinsa miangkon sa pagpatay kang Wee, nitino nga adunay laing upat ka mga suspek sa pagpatay sa abogado.
Usa sa mga suspek, si retired Col. Edwin Layese, naghinganlan kang Dicdican ug usa ka Miss Riza nga mastermind nga mibayad og P1.5 milyones aron mapatay si Wee.
