Nahukmang guilty ang kanhi mga opisyal sa Department of Public Works and Highways (DPWH)-7 ug ang usa ka private contractor sa kasong graft pinaagi sa Sandiganbayan 6th Division kabahin sa kontrobersyal nga streetlights nga gigamit sa 2007 ASEAN Summit sa Sugbo.
Sa giluwatang desisyon gikan sa maong anti-graft court, silotan og unom ngadto sa walo ka tuig nga pagkapriso silang kanhi DPWH regional director Robert Lala, mga sakop sa Bids and Awards Committee nga silang Pureza Fernandez ug Agustinito Hermoso, ingon man ang chairman sa GAMPIK Construction and Development nga si Gerado Surla gumikan lang sa upat ka mga street-lighting projects nga mokabat og kapin P35-million.
Kahinumdumang nahimong kontrobersyal ang maong poste gumikan sa overpricing diin mokabat ang actual cost niini og kapin P12-million.
Nakita sa Sandiganbayan nga ilegal ang napirmahang memorandum of understanding tali sa DPWH-7 ug private contractor niadtong November 22, 2006 gumikan sa pagduda sa gigamit nga pondo.
Naaprubahan nilang Associate Justice Kevin Narce Vivero ang maong desisyon ug gisegundahan nilang Division Chairperson Sarah Jane Fernandez and Associate Justice Karl Miranda.
