Nagsugod ang madugong hitabo niadtong alas 10:00 sa buntag sa dihang gipusil patay sa suspek nga si Jay Castañares ang usa ka vendor nga si Emilio Miñoza Sabroso, taga Barangay Greenhills, samtang nagsakay kini sa iyang motorsiklo sa lungsod sa San Fernando.
Sigun sa mga saksi, kalit lang gipusil ni Castañares ang ulo sa biktima nga miresulta sa hinanali niining kamatayon.
Dali nga miresponde ang San Fernando Municipal Police Station sa pagpangulo ni Police Major Michael Gingoyon, apan wala pa gani sila makaduol sa balay sa suspek sa Sityo Boloc-Boloc, Barangay Sangat, gipamusil na sila niining suspek.
Tungod niini, nangayo sila og back-up gikan sa SWAT sa dakbayan sa Naga ug sa Regional Mobile Force Battalion (RMFB) 7. Milanat og pipila ka oras ang binayloay og bala tali sa duha ka habig.
Wala dayon mosulod ang mga polis tungod sa impormasyon nga duna’y gikuptan nga duha ka granada ang suspek, ug pag-abot sa alas 4:00 sa hapon, mihimo og tactical movement ang kapulisan ug ilang nakita ang suspek nga nagpasalipod sa bungbong nga semento sa balay niini.
Atol sa engkwentro, usa sa mga sakop sa RMFB-7 nga si Police Patrolman Kim Villariasa ang naigo sa iyang tuong dughan, hinungdan nga mi-aksyon ang maong polis pinaagi sa pagpaulan og bala sa balay sa suspek, diin nadungog dayon ang duha ka sipang buto nga gituohang gikan sa LPG ug granada nga dala ni Castañares, hinungdan sa pagkasunog sa iyang panimalay.
Human sa clearing operation, nakit-an ang suspek nga wala nay kinabuhi, duna’y mga samad pinusilan sa lawas, ug nasunog usab ang katunga sa iyang parte sa lawas, ug ang naangol nga polis daling gidala sa Cebu Provincial Hospital sa dakbayan sa Carcar.
Si Castañares, kinsa usa ka kanhi konsehal sa Barangay Sangat niadtong 2016, naila nga gikahadlokan sa maong dapit. Base sa record sa Cebu Police Provincial Office, nalambigit kini sa kaso sa illegal nga drugas niadtong 2017 ug nakagawas lang niadtong Oktubre 2025.
Gitumbok usab siya nga responsable sa pipila ka pagpamusil sukad pa niadtong 2010, lakip na ang pagpatay kang Carl Vinson Apura niadtong 2012.
Sa pikas bahin, eksklsibong gihinabi sa Bombo Radyo Cebu si Emem Suarez, ig-agaw sa suspek, ug iyang gikutyag nga sa iyang pag-ila ni Castañares, makig abi-abihon nga tao ug ingun man utukan.
Apan, dili na siya sigurado kung susama ba kini sa karakter nga ilang nailhan kung sa lain ug uban tao na ang nahimamat niini kung hisgutan.
