CENTRAL VISAYAS- Nidepensa ug nanghinaw si Mary Faith Glean isip ikatulong saksi sa prosekusyon batok sa St. Timothy Construction, kini human malakip ang iyang pangalan isip investor sa maong kompanya.
Si Glean, kinsa nagtrabaho gikan sa tuig 2018 hangtod 2025, gipresentar sa prosekusyon aron pamatud-an ang giingong anomalosong binuhatan sa managtiayong Pacifico “Curlee” Discaya II and Sarah Cruz Discaya.
Sa iyang testimonya, gitudlo ni Glean si Discaya isip tinuod nga tag-iya sa siyam ka mga construction firm, lakip na ang St. Timothy nga nagsilbi lamang siyang liaison officer.
Atol sa hearing nga gipahigayon gahapong adlawa, Abril 28, gimandoan pa ang saksi nga duolon ug hikapon si Discaya aron pamatud-an ang pag-ila niini sa tag-iya sa kompanya.
Gibutyag usab ni Glean nga sulod sa pito ka tuig niyang pagpangalagad, ang iyang sweldo mokabat lamang sa 14,000 pesos matag bulan, apan nakadawat siya og kinatibuk-ang komisyon nga 4 milyones pesos.
Kini tungod kay nalakip ang iyang ngalan sa Board of Directors aron makasalmot sa mga bidding, diin duna siya’y 20% nga bahin kon makadaog ang proyekto.
Sa bahin sa depensa, gipaubos sa cross-examination si Glean diin kusganon niyang gihimakak ang mga dokumento ug giingon nga gi-forge o gisundog lang ang iyang pirma. Gituki usab sa depensa kon ngano nga wala siya’y gihimong lakang bisan pa sa maong alegasyon.
Nasayran nga niadtong Oktubre 5, 2025, sa dihang nibuto ang balita bahin sa anomaliya, niduol si Glean sa magtiayong Discaya aron mangutana sa angay buhaton. Pagka-Septyembre 9, nihangyo siya nga tangtangon ang iyang ngalan sa listahan, apan giingnan siya nga kinahanglan una siyang mangita og kapuli.
Natapos ang relasyon ni Glean sa kompanya niadtong Oktubre 27, 2025, human siya niduso og kaso sa Department of Labor and Employment (DOLE) tungod sa nadawat niyang letter of termination gikan sa mga Discaya.
Subay niini, gikabutyag ni Attorney Cornelio Samaniego III ang Defense Council sa managtiayong Discaya nga sa ilahang habig andam sila, ug hugot ang ilahang baruganan nga ang witness, si Glean, tinuod nga lakip sa board members sa St. Timothy Construction, ug dako nilang pagkangangha ug hibong nganung gihimakak kini sa naasoyng witness.
Dugang pa ni Atty. Samaniego nga gawas sa pag-deny ni Glean kabahin sa iyahang pagkalakip sa St. Timothy Construction, wala usab gi-apil niini ang mga komisyon nga nadawat, hinungdan nga hugot ang baruganan ni Atty. Samaniego nga miyembro kini sa board sa St. Timothy Construction.
Dugang ni Atty. Samaniego, dakong kahibulong sa ilahang habig gumikan kay nganung sa pag-angkon ni Glean, usa siya ka Liaison Officer, kini gumikan kay sa dokumento, board of director kini.
Busa alang niya, dili mamahimo nga isalikway ni Glean nga dili siya miyembro sa board of director sa St. Timothy Construction.
Gani, gitino ni Atty. Samaniego nga ang girepresentar ni Glean kabahin sa iyahang deed of service, kuwang pa, tungod kay giingong aduna pa kini mga wala gisumiti kabahin sa komisyon nga nadawat niini ug ang gibutang lang niini mao ang pay slips nga adunay kantidad nga dili ingun ana kadako.
Apan, matod niya, sukad sa tuig 2018 hangtud 2025, gikompirmar niini nga miyembro gayud kini sa board, nagdawatan og komisyon, ug sa mga nadaogan nga mga bidding, ug anaa kini sa kontrata ni Glean nga aduna siyay 20% nga komisyon nga incentives gikan sa kompanya.
