CEBU – Opisyal na nga ginganlan nga Ouano Avenue ang kanhi Mandaue Causeway Road sa North Reclamation Area human napirmahan ang nagsuporta nga balaod.
Gipaambit ni Cebu Sixth district Rep. Emmarie “Lolypop” Ouano-Dizon ang maong kalambuan pinaagi sa usa ka social media post.
Gipirmahan ni Presidente Rodrigo Roa Duterte ang RA 11730 niadtong Abril 29, 2022, nga opisyal nga nagngalan sa Mandaue Causeway isip Ouano Avenue, aron pagpasidungog sa mga Ouano nga nagserbisyo sa mga Mandauehanon sukad sa sayong bahin sa 1900s.
Si Deputy Speaker Pablo John “PJ” Garcia maoy nahimong author sa maong balaod.
Adunay gitas-on ang Ouano Avenue nga 2.489 ka kilometro gikan sa eskina sa SB Cabahug St. ngadto sa Tipolo Creek sa Barangay Centro ug sa Mandaue Reclamation Area, dayon ngadto sa taytayan sa Mahiga Creek paingon sa Cebu International Port.
