Opisyal na nga nisang-at og election protest si kanhi Mandaue City Mayor Jonas Cortes nga naghagit sa resulta sa piniliay ug sa proklamasyon ni Thadeo Jovito “Jonkie” Ouano isip mayor, human sa May 12, 2025 national ug local polls.
Diin ang protesta, nga gisumiter gahapon, gisang-at sulod sa gitugot nga napulo ka adlaw ubos sa balaod sa eleksyon.
Kini subay sa iyang gibarugan ug pagtuo nga adunay kahiwian ug posibleng pagpanikas nga nahitabo sa resulta sa bag-o lang nga nahuman nga piniliay diin siya napildi.
Ang petisyon gibase sa daghang legal nga probisyon, lakip ang Article XII-C, Section 2(b) sa 1986 Philippine Constitution; Article XIV, Section 58 sa Batas Pambansa Blg. 697; ug Article XXI, Section 249 sa Omnibus Election Code.
Matud ni outgoing City Administrator Atty. Jamaal James Calipayan, ang kampo sa Cortes nakadokumento sa daghang mga insidente, gisuportahan sa mga affidavit gikan sa mga tigbantay sa botohan, legal nga representante, ug mga botante nga adunay pakyas ug pagpanikas.
Usa sa mga mahinungdanong isyu nga gipatungha sa petisyon naglambigit sa mga clustered precincts diin ang gidaghanon sa balido nga mga boto gikataho nga milabaw sa gidaghanon sa mga rehistradong botante, ingon man sa mga tinuod nga mibotar.
Gihatagan og gibug-aton ni Calipayan nga kining mga kalainan nagkuwestiyon sa integridad sa proseso sa eleksyon ug sa tinuod nga mandato sa mga botante.
Ingon man nga giklaro nila nga ang tumong sa ilang gihimo nga lakang kay aron mahatagan sila og katin-awan pinaagi sa usa ka manual recount aron mahibal-an ang tinuud nga kabubut-on sa mga taga Mandaue.
Una na niini, usa ka reklamo nga nagpatunghag susamang mga isyu ang gisang-at sa City Board of Canvassers sa wala pa ang proklamasyon ni Ouano, apan kini gibasura tungod sa giingon sa mga opisyal nga usa ka “mislabeling issue”.
Gani, gisaway kini ni Calipayan nga katarungan, nga nagtawag niini nga dili igo tungod sa kabug-at sa mga anomaliya, ug namatikdan ang katuyoan sa team nga ipasaka ang kaso sa Korte Suprema.
