CEBU – Laing Sugboanon na usab ang molingkod sa nasudnong kagamhanan ubos sa Department of Tourism (DOT).
Kini human gitudlo si kanhi Naga City Mayor, Atty. Kristine Vanessa Chiong-Genegobis, isip Assistant Secretary for Special Concerns sa DOT.
Gikompirmar kini sa Naga City Government niadtong Agosto 2 diin nagkanayon nga bag-ohay lang nanumpa si Chiong isip bag-ong opisyal sa ahensya.
Gipangulohan sa pagkakaron ang DOT ni Sec. Christina Garcia-Frasco ug sama kang Chiong-Genegobis, kanhi mayor usab si Frasco sa lungsod sa Liloan sa amihanang Sugbo.
Unang nahimong mayor si Chiong-Genegobis sa Naga City gikan sa 2016 hangtod 2019, ug gikan sa 2020 hangtod 2022.
Ubay-ubay usab nga mga Cebuano executives ang niapil kang Frasco isip bag-ong opisyal sa DOT diin lakip niini sila si kanhi Liloan Councilor Ferdinand “Kokoy” Jumapao, kanhi Presidente sa Integrated Bar of the Philippines – Cebu City (IBP-Cebu City) Elain Bathan, ug kanhi Capitol Chief Protocol Officer Ronald Conopio.
