MANDAUE CITY-Nakuhaan og gibana-banang P1.5 milyones nga kantidad sa gituohang shabu ang usa ka kanhi nga nurse atol sa buy-bust operation sa Barangay Jagobiao, dakbayan sa Mandaue, kagahapong adlawa.
Giila sa mga kapulisan nga gipanguluhan ni Police Colonel Maribel Getigan ang dinakpan nga si Jhon Rosalia Buhia, kinsang kanhi nurse, taga Borgus, dakbayan sa Bacolod apan kasamtangang nagpuyo sa Barangay Arpili, Balamban, kasadpang Sugbo.
Nasayran nga usa ka High Value Individual (HVI) ang nasikop atol sa gipahigayong joint buybust operation sa City Intelligence Unit (CIU) ug City Drug Enforcement Unit CDEU sa Mandaue City Police Office MCPO sa may Plaza Eversley, Brgy Jagobiao.
Matud sa mga otoridad nga ang nakuha nga ginadiling drogas mokabat sa 220 gramos nga mobalor og P1,496,000, diin maka-dispose kini og tag 2 ka kilo sa shabu sulod sa usa ka buwan.
Dugang pa sa mga kapulisan nga ang dinakpan usa ka ‘drug courier’ sa usa ka binilanggo sa New Bilibid Prison NBP ug nag operate sa may lungsod sa Balamban, Consolacion, dakbayan sa Mandaue ug sa mga kasikbit nga mga dapit.
Samtang, ang pagkasikop ni Buhia, maoy nakapaminus sa supply sa ilegal nga drogas sa dakbayan sa Mandaue.
