CEBU CITY – Masulub-un nga gibalik-lantaw sa usa ka kanhi Overseas Filipino Worker (OFW) ang iyahang kasinati-an sa mga kamut sa iyahang employer sa nasud nga Kuwait.
Gibutyag ni alyas ‘Aimie’ nga dili na gayud siya mubalik pa sa pagtrabahu sa Kuwait o sa bisan asa nga lugar sa Middle East gumikan kay alang kaniya pagpangabuso lang ang nahibal-an sa mga employer ug giingung susamang natural na gayud ang ilahang pagka-abusado.
Matud pa niini nga swerte na lang ang usa ka OFW nga matunong kini sa usa ka maayu nga employer.
Dugang pa nga wala usab niya nasinati nga aduna silay proteksyun isip mga OFW ngadtu sa Kuwait kung diin bisan pa man nga mu report sila sa agency giingung wala ra man sa gihapu’y aksyun.
Subay niini, dakung uyun si Aimie sa pag-ban ni Presidente Rodrigo Duterte sa mga OFWs nga mupaingun sa Kuwait.
Gi-asuy niini nga dili lalim ang ilahang mga kasinati-an nga naabusuhan sa ilahang mga employer ug swerte na lang nga buhi pa siyang naka-uli sa Pilipinas.
Sugyut na lang niini ngadtu kang Presidente Duterte nga adunay igung trabaho diri sa Pilipinas, maayu ang sweldu arun nga wala na’y Pilipino nga makahunahuna pa nga mulangyaw sa laing nasud ilabi na ngadtu sa Middle East.
