Gikompirmar ni retired police colonel ug kanhi PCSO General Manager Royina Garma nga gisagop sa administrasyong Duterte ang gitawag nga “Davao model” sa gubat batok sa ilegal nga drugas diin gihatagan og reward ang mga opisyal nga nalambigit sa pagpatay sa mga drug suspects.
Sa affidavit nga gisumiter ni Garma sa Quad Committee, gidetalye niini ang pagpatuman sa “Davao model”.
Nahimong emosyonal si Garma sa dihang gibasa niya ang iyang supplemental affidavit nga may kalabotan sa war on drugs sa miaging administrasyon.
Sa affidavit ni Garma, iyang gipahibalo nga adunay tulo ka mode of payment o ang rewards nga gihatag.
Matod niya, una sa matag suspek nga gipatay; ikaduha alang sa giplano nga operasyon ug ikatulo nga refund sa mga galastuhan sa operasyon.
Giangkon usab ni Garma nga si kanhi Presidente Rodrigo Duterte ang personal nga nanawag kaniya alang sa pagtukod og national task force.
Nahimamat niya si kanhi Mayor Rodrigo Duterte tungod kay nagserbisyo siya isip Station Commander sa usa sa mga police station sa Davao City.
Gidugang ni Garma sa ilang pakigtagbo sa kanhi Presidente, nihangyo siya nga mangita og opisyal sa PNP nga miyembro sa Iglesia Ni Cristo tungod kay nagkinahanglan siya og opisyal nga adunay katakos sa pagpatuman sa war on drugs sa nasudnong sukod diin kini magsundog ang modelo sa Davao.
Ingon man nga emosyonal kini nga nangayo og pasaylo sa mga pamilya sa biktima sa war on drugs tungod wala niini napa-imbistigahan ang ilang tagsa-tagsa ka kaso.
