Gitangtang na sa listahan sa Philippine National Police (PNP) tungod sa absent without leave (AWOL) ang opisyal sa kapulisan nga giingong nanglugos sa 14-anyos nga batang babaye sa lungsod sa Ginatilan niadtong Septiyembre 28, 2025.
Matod ni Police Colonel Abubakar Mangelen Jr., provincial director sa Cebu Police Provincial Office (CPPO), nga gideklarar nga AWOL ang police official nga naghupot sa ranggo nga Police Lieutenant.
Nag-atubang ang opisyal karon sa kasong kriminal ug administratiba.
Matud ni Mangelen, nga gawas sa gitaktak nga opisyal, gipasakaan usab og kasong administratiba ang ubang police personnel sa samang estasyonan nga giingong mitabang sa suspek nga makaikyas.
Dugang pa niini nga wala na nila awhaga ang suspek nga mo-surrender sanglit posibleng mogawas na ang warrant of arrest niini.
Gitataw ni Mangelen nga dili motugot ang PNP sa mga sakop nga mohimo sa maong mga buhat ug nipasalig nga ang kanhi pulis maoy husayon.
