METRO MANILA-Nipahinumdom si kanhi Presidente ug karon Pampanga Rep. Gloria Macapagal-Arroyo nga ang bisan unsang hearsay dili angayang dawaton isip personal nga kahibalo sa mga resource person.
Gihimo sa kanhi presidente ang pamahayag atol sa ikaupat nga pagdungog sa Quad Committee nga nagbutyag sa giingong mga paglapas sa balaod sa pipila ka mga pulis, mga krimen nga nalambigit sa Philippine Offshore Gaming Operators (POGO) ug uban pa.
Matod ni Arroyo, ang mga testimonya basi sa mga istorya nga dili basi sa personal nga kahibalo giingong dili kasaligan.
Hinungdan nga nipahinumdom kini nunot sa nahitabong pagpamatay sa pipila ka mga piniriso gikan sa Davao, nga sila si Fernando Magdadaro ug Leopoldo Untalan Tan Jr.
Kahinumduman nga sila si Magdadaro ug Tan niingon nga sila nagtuo nga gikan kang kanhi Presidente Rodrigo Duterte ang kamandoan sa pagpatay sa tulo ka Chinese drug lords.
Matod nila halos dili na nila madungog ang tingog ni Duterte samtang nakig-estorya sa telepono ni Supt. Gerardo Padilla.
