CEBU CITY – Nasikup sa gipahigayun nga drug operation ang kanhi miyembro sa Philippine National Police (PNP) Class 1996 ug ang live in partner niini sa Barangay Kamagayan, dakbayan sa Sugbo, kagabii.
Giila ang mga dinakpan nga sila si Dahlia Celedio, 38 anyus, kanhi pulis nga na-assign sa Getafe Police Station; Julius Nacua, 46 anyus, live in partner ni Celedio; ug si Jefferson Buendia, 34 anyus, ulitawu, ug pulus mga residente sa nahisgutang dapit.
Una niini, nagpahigayun ug drug operation ang mga sakup sa City Drug Enforcement Unit, Cebu City Police Office personnel nga gipanguluhan ni Police C/Insp Jackyll Bilibili, ubus sa superbisyon ni CCPO Director Police Sr/Supt Royina Garma, kung diin miresulta sa pagkasikup sa mga nahisgutang dinakpan.
Nakuha gikan ni Nacua ang lima ka gagmay nga pakete sa shabu, usa ka medium size, ug pipila ka mga drug paraphernalias; samtang nakuha gikan sa kanhi pulis nga si Cedelio ang 19 ka mga gagmay nga pakete sa shabu, 15 ka nubain, ug duha ka syringe; ingun man nakuha gikan ni Buendia ang duha ka gagmay nga pakete sa shabu ug illegal drug sniffing paraphernalias.
Sa kinatibuk-an, ang mga nakuha nga iligal nga drugas gikan sa mga dinakpan, ang nagkantidad ug 118,000 ka pesos.
Mag-atubang ug kasong adunay kalapasan sa Republic Act 9165 o Comprehensive Dangerous Drug Act ang mga dinakpan.
Nasayran nga si Cedelio ang nag-AWOL niadtu pang Marso tuig 2003.
