CEBU – Gipaabut na lang sa Siaton Negros Oriental Police Office ang mga saksi o mga complainant sa KAPA-Community Ministry, Inc. una sila magpahigayun ug police operation.
Kini human nga gikumpirmar sa kapulisan nga nakasulud na ang KAPA sa ilahang probinsya ug adunay mga tawu na ang naka-invest niini.
Gihimug-atan ni Police Major Don Richmond Conag, ang chief of police sa Siaton, nga klaru ug tataw nga usa ka investment scam ang KAPA gumikan kay wala kini business permit ug dili tataw kung kini ba usa ka investment company o religious group.
Sa imbestigasyon sa kapulisan, nasayran ni Police Major Conag nga usa ka deed of donation ang pirmahan sa mga kliyente, butang nga giingung klaru nga dili kini usa ka ligal nga investment.
Dugang pa sa hepe, gisusi kini nila sa Treasurer’s Office sa munisipyo ug matud pa, gisulayan sa KAPA nga mukuha ug business permit apan wala kini tuguti sa LGU.
Samtang, giklaru ni Conag nga wala sa iyahang mga tawu ang misulud sa nahisgutang investment scam.
