CENTRAL VISAYAS-Gipahibalo sa Visayas Command nga hingpit na nga naaguman sa mga grupong terorista ang kapildihan human sa agresibong pakigbatok sa mga troopa diin sa 1st Quarter ning tuiga aduna na’y 44 ka mga armadong engkwentro ang nahitabo sa tibuok rehiyon sa Kabisay-an.
Diin, kini nga mga engkwentro misangpot sa pag-neutralize sa kinatibuk-ang 51 ka mga terorista sa NPA; 20 niini ang namatay atol sa mga engkwentro samtang 27 ang nibalik sa toril sa balaod, samtang upat ang nasikop.
Sa pakighinabi sa Bombo Radyo Cebu NewsTeam kang Lt. Col. Israel Galorio, ang tigpamaba sa Visayas Command gibutyag niini nga ang mga salin nga NPA nagpahigayon og ‘leadership vacuum’ gumikan usa sa mga hagit nga giatubang sa mga terorista ang mohulip sa mga napatay nga leader atol sa mga engkwentro.
Dugang sa opisyal nga kung subayon ang lihok sa mga CPP-NPA, nagpakita kini nga wala’y direksyon ug dali nga makit-an sa mga sibilyan hinungdan nga dali usab sila nga maaksyunan sa mga troopa.
Gani, ang 44 ka mga armadong engkwentro tungod kini sa pakiglambigit sa mga komunidad diin sila mismo ang mIhatag og impormasyon sa mga kuta sa mga terorista.
Subay niini, gihimug-atan ni Galorio nga bisan paman nga matuldukan ug mahurot ang mga terorista, dili kini nagpasabot nga humana ug hapsay na gumikan ang kamatuoran nga mitumaw ang mga grupo tungod sa ‘legitimate issues’ nga anaa sa komunidad.
Hinungdan nga ang mga lakang sa Visayas Command dili lang puro military approach ug giduyogan kini og development.
