Gipabakwit ang kapin sa 10,000 ka mga residente human miulbo ang dakong sunog sa habagatang bahin sa France, duol sa utlanan sa Spain, sumala sa mga awtoridad.
Nagpadayon pa ang pakigbatok sa mga bombero aron makontrol ang sunog nga nakalamoy na og hapit 4,600 ka ektarya sa kalasangan sa tiilan sa French Pyrenees.
Matod sa mga opisyal, 16 ka mga tawo ang nasamdan, lakip ang upat ka mga bombero nga naapektuhan samtang nag-atubang sa sunog.
Gipaabot nga mokaylap pa ang kalayo sa umaabot nga mga oras tungod sa grabeng kainit ug kusog nga hangin nga nagpalala sa kahimtang.
Tungod sa kadako sa kadaot, nangayo og tabang ang France pinaagi sa mekanismo sa European Union, nga nagpadala og upat ka water-bombing aircraft gikan sa Cyprus ug Sweden, ingon man kapin sa 100 ka mga bombero aron motabang sa emergency response team sa Trevillach, duol sa Perpignan.
Si European Commission President Ursula von der Leyen mipahayag nga andam ang European Union sa pagsuporta sa France sa pag-atubang sa maong kalamidad.
Matod sa mga eksperto, ang taas nga temperatura nga nasinati sa France ug ubang bahin sa Europe sa miaging mga bulan nakapauga sa daghang yuta, nga nakapasayon sa pagkaylap sa mga sunog sa kalasangan.
Gilauman usab nga mosaka pag-usab ngadto sa 40 degrees Celsius ang temperatura sa habagatan-kasadpang bahin sa France karong semanaha, samtang padayon usab ang grabeng kainit sa Spain ug Portugal.
