Gilauman ang pagdagsa sa kapin 16 ka milyong turista sa New York ug New Jersey atol sa pagpahigayon sa FIFA World Cup 2026 Final, nga gilauman usab nga makapadasig sa ekonomiya sa maong lugar.
Sa eksklusibong pakighinabi sa Bombo Radyo Cebu, gibutyag ni Bombo International Correspondent Florante Coronel nga bisan wala pa magsugod ang final, namatikdan na ang pagsaka sa gidaghanon sa mga turista nga nangabot sa New York.
Matud pa ni Coronel, gibanabana nga anaa sa 12 ka milyon sa gilaumang mga bisita ang gikan sa ubang nasud, samtang ang nahibilin gikan sa nagkalain-laing estado sa Estados Unidos.
Tungod niini, gilauman ang pagsaka sa kita sa mga hotel, restawran, transportasyon ug ubang negosyo nga moserbisyo sa mga bisita atol sa maong kalihokan.
Sa bahin sa seguridad, gipasalig ni Coronel nga wala’y namatikdang aktibong hulga sa kasamtangan ug andam ang mga otoridad sa New York ug New Jersey sa pagpatuman sa higpit nga security measures aron masiguro ang kaluwasan sa mga atleta, fans ug mga residente.
Dugang niya, dugay nang naanad ang New York sa pagdumala sa dagkong internasyonal nga mga kalihokan tungod kay nahimutangan kini sa United Nations ug ubang importanteng sentro sa financial ug komersiyo.
Samtang sa transportasyon, giingon ni Coronel nga gipalugway sa mga otoridad ang oras sa operasyon sa pipila ka linya sa tren ug gipaandam ang ubang mass transportation aron matubag ang gilaumang pagdagsa sa mga pasahero.
