Nakatala ang Cebu Provincial Health Office (PHO) og kinatibuk-ang 381 ka kumpirmadong kaso sa dengue sa tibuok probinsya sa buwan sa Hulyo, base sa pinakabag-ong datos sa surveillance gikan sa mga local government units (LGUs).
Lakip sa mga lugar nga adunay pinakataas nga ihap sa gitaho nga mga kaso mao ang Toledo City diin adunay 49 ka mga kaso, Barili adunay 39 ka mga kaso, Talisay City adunay 34 ka mga kaso 34, Consolacion adunay 33 ka mga kaso, ug Carcar City ug Medellin adunay parehong 19 ka mga kaso sa dengue ang natala.
Gikataho usab nga ang pagsaka sa mga kaso sa dengue karong buwana, lagmit tungod sa padayon nga pag-ulan sa tibuok probinsya.
Diin, ang datos gikan sa Provincial Health Office (PHO) nagpakita nga sa miaging lima ka semana, kapin sa 300 ka kaso sa dengue ang natala sa mga ospital nga gidumala sa Kapitolyo sa 25 ka lokalidad.
Duha usab ka namatay ang gitaho, nga naglambigit sa mga pasyente gikan sa Consolacion ug Compostela.
Samtang, gikabutyag ni Public Health Consultant Dr. Nikki Catalan nga ang Cebu Provincial Health Office nagpadayon nga nagmonitor sa sitwasyon sa tanang LGUs sa kasamtangan.
Iyang giklaro nga samtang ang pagtaas sa mga kaso usa ka hinungdan sa kabalaka, ang probinsya wala magdeklarar og dengue outbreak.
