Nakasinati gihapon og brownout ang pipila ka bahin sa Mindanao, lima ka adlaw human sa magnitude 7.8 nga linog.
Sumala sa Department of Energy (DOE), kapin sa 30,000 ka mga konsumidor ang wala pa gihapoy suplay sa kuryente.
Sa usa ka interbyu, gibutyag ni DOE Undersecretary Mario Marasigan nga padayon nilang gimonitor ang duha ka electric cooperatives nga wala pa hingpit nga naayo tungod kay nahimutang sa mga hilit nga dapit ang ilang distribution lines.
Aron mapadali ang pagpahiuli sa serbisyo, gipalihok na sa gobyerno ang “Task Force Kapatid” sa General Santos City ug Davao del Sur, diin ang mga electric cooperatives gikan sa laing mga rehiyon nagtinabangay na sa pagpang-ayo sa mga nangadaot nga linya.
Giklaro sa DOE nga ang nagpadayong rehabilitasyon naka-focus lang sa pagpabalik sa serbisyo ug dili kini magdala og umento o usbaw sa singil sa kuryente sa mga konsumidor.
Sa pagkakaron, sumala sa National Electrification Administration (NEA), anaa na sa 96% sa mga naapektuhang dapit sa Mindanao ang nabalikan og kuryente, diin lakip niini ang 24 sa 25 ka mga lungsod sa habagatang bahin sa isla.
