Gitaho sa National Disaster Risk Reduction and Management Council (NDRRMC) nga kapin sa 3,000 ka mga indibidwal ang nabakwit o gipabakwit tungod sa pag-uwan nga dala sa bagyong Ferdie bisan og kadali lang kini sa nasud nga niigo sa Habagatan-kasadpan.
Basi sa datos nga gipagawas sa ahensya gahapong adlawa, moabot sa 4,464 ka pamilya o katumbas sa 14,215 ka indibidwal ang apektado sa bagyo sa Western Visayas, Davao Region ug Soccsksargen region.
Sa maong ihap, mokabat sa 1,070 ka pamilya o katumbas sa 3,408 ka mga indibidwal ang gipabakwit sa ilang mga panimalay ug temporaryong nagpuyo sa 74 ka evacuation centers samtang ang uban gipili nga magpabilin una sa ilang mga kabanay ug higala.
Pipila usab ka mga balay ang nangaguba tungod sa kusog nga hangin nga dala sa bagyo diin 5 ka balay ang hingpit nga naguba samtang 12 ang partially damaged sa Antique, Negros Occidental, Davao Occidental, Davao Oriental, ug Saranggani.
Agi’g tubag, ang kagamhanan niapod-apod na sa katugbang nga hinabang alang sa mga biktima sa bagyo sa kantidad nga P921 milyones nga hinabang.
