Mokabat sa 812 ka pamilya nga unang naapektuhan sa bagyong Nika ang nagpabilin pa sa mga evacuation center sa Cordillera.
Matod sa Office of Civil Defense, nga 75 ka evacuation centers sa Cordillera ang nagpabiling abli diin temporaryong nagpuyo ang mga bakwit.
Gawas sa kapin 800 ka pamilya, 547 ka pamilya ang temporaryong nagpuyo uban sa ilang mga kabanay kini naglangkob sa kapin 1,800 ka mga indibidwal.
Sa kataas sa pagkusokuso sa bagyong Nika, moabot ngadto sa 4,024 ka pamilya ang napugos sa pagpabakwit katumbas kini sa 10,800 ka tawo.
Gipaabot nga makabalik na sila sa ilang mga panimalay sa mosunod nga mga adlaw human sa paghimo og inspeksyon sa ilang mga balay nga naapektuhan sa bagyo.
Basi sa inisyal nga report, adunay 47 ka mga balay sa Cordillera ang nangaguba sa bagyo. Tulo niini ang hingpit nga nadaot.
