Nagpadayon ang profiling sa Cebu City Department of Social Welfare and Services (DSWS) sa mga biktima sa sunog nga miigo sa residential area sa Sitio Silangan, Barangay Tejero, Dakbayan sa Sugbo, Sabado sa gabii, Mayo 16.
Sumala kang Portia Basmayor, head sa DSWS, miabot na sa 945 ka indibidwal o 247 ka pamilya gikan sa 134 ka panimalay ang na-profile na sa ahensya, base sa rekord sa Cebu City.
Padayon usab ang pagpanghatag og hot meals ug uban pang pagkaon sa DSWS, lakip ang nagkadaiyang ayuda alang sa mga apektadong residente sa mosunod nga mga adlaw.
Samtang, nagpadayon ang pagdawat og donasyon gikan sa nagkadaiyang organisasyon ug mga indibidwal alang sa mga internally displaced persons (IDPs) nga naapektuhan sa sunog.
Sa talaan sa dakbayan, 120 ka panimalay ang totally burned, samtang 14 ang partially burned. Natala usab ang 71 ka panimalay nga adunay duha hangtod tulo ka pamilya nga nag-ambit sa usa ka balay, ug 40 ka mga nag-abang. Aduna usab 11 ka boarders o lodgers, apan wala pa gipagawas ang kompletong detalye samtang nagpadayon ang profiling ug validation.
Gipasabot sa siyudad nga adunay pipila ka residente nga nibalik na sa ilang mga pamilya o nibalhin sa laing temporaryong kapuy-an, mao nga dili tanan nakapabilin sa evacuation area ug mga tent nga gitukod sa DSWS.
Karong adlawa, magpadayon ang verification ug validation sa mga benepisyaryo samtang padayon usab ang pagpanghatag og pagkaon. Nag-andam na ang siyudad alang sa posibleng housing materials ug financial assistance para sa mga nasunogan.
Gitudlo sa Cebu City ang Tejero Elementary School Gym isip evacuation center samtang nagpadayon ang assessment sa DSWS.
Walay natala nga casualty o namatay sa maong insidente, sumala sa mga awtoridad.
