TALISAY CITY,CEBU- Nasakmit sa mga sakop sa Anti-Agricultural Economic Sabotage (AAES) Council sa ilang pinakaunang operasyon ang kapin sa 26,000 nga mga sako sa gituhoang smuggled nga bugas sa usa ka bodega sa Rabaya St., Barangay San Roque sa dakbayan sa Talisay niadtong Miyerkules sa udto, Hulyo 9, 2025.
Nasusi sa mga awtoridad sa hiniusang operasyon sa AAES Council, Criminal Investigation and Detection Group 7, Department of Agriculture, PNP Maritime Group, Philippine Coast Guard 7, ug uban pa ang mga sinakong bugas nga gikan pa sa nasud nga Pakistan ug Vietnam og adunay bana-banang balor sa P38-milyones.
Personal mismong gisusi ni Frederick Go, ang Special Assistant to the President for Investment and Economic Affairs ang maong operasyon diin matod pa niya nga kini ang pinakauna sa tibuok Pilipinas ang pagpatuman sa balaudnong Republic Act 12022 kun ang Anti-Agriculture Economic Sabotage Law.
Gani ang Department of Justice (DOJ) kay gikatakdang mopasaka og kasong economic sabotage sa tag-iya sa bugas nga mao ang River Valley Distribution Incorporated (RVDI) din wala kiniy pyansa nga gitugot sa korte.
Nagkanayon sab si Police Major Marlo Gabato sa Regional Maritime Unit 7 nga nagbase ilang nakuhang impormasyon nga adunay bodega sa smuggled nga bugas gikan sa laing nasud sa maong dapit hinungdan nga mi-apply sila og Letter of Authority aron ipatuman ang pagpangronda.
Apan permiso lang para sa 6,000 ka mga sako sa bugas ang napakita sa maong patigayon hinungdan nga kusog ang merito sa kasong ipasaka batok sa illegal nga binuhatan.
Samtang ang abogado sa RVDI nga si Atty. Christina Angelie Abellana kay mipahibalo nga mubuhat sila sa tanang legal nga lakang aron mapamatud-an ang lehitimong patigayon sa iyang kliyente.
Gipasalig karon sa mga awtoridad nga pahugtan pa nilang ang monitoring batok rice smuggling dili lamang sa Sugbo apan sa tibuok Central Visayas.
