Malampuson nga na-deport sa gobyerno sa Pilipinas ang kapin sa gatos ka mga Chinese ex-Philippine Offshore Gaming Operators nga mga trabahante balik sa China.
Matod sa Presidential Anti-Organized Crime Commission, gibayran sa gobyerno sa China ang ilang pamasahe aron dili sila makaikyas.
Sa usa ka pamahayag, si PAOCC Executive Director Undersecretary Gilbert Cruz miingon nga sa higayon nga ang mga deportees moabot sa China, sila ipailalom sa tukmang imbestigasyon.
Lakip sa ilang imbestigahon mao ang ilang mga ilegal nga kalihokan sama sa scamming, cybercrime, fraud, ug money laundering, nga hugot nga gidili sa China.
Dugang pa nga importante sa China ang impormasyon nga ilang makuha gikan sa mga kadagkoan sa POGO, busa importante nga makaabot kini sa ilang nasud.
Una nang gimando ni Presidente Ferdinand Marcos Jr. ang pagsuspenso sa tanang operasyon sa POGO sa Pilipinas niadtong Hulyo 22, 2024.
Kini nunot sa pagkadiskobre sa mga ilegal nga kalihokan niini sa nasud sama sa torture, love scam, ug uban pang krimen.
