Malampusong naluwas sa gobyerno sa Nigeria ang mga 100 ka mga estudyante nga gidagit sa miaging bulan ug gidala sa kaulohan sa Minna, apan wala giatataw sa gobyerno ang mga detalye sa operasyon, lakip na kung kini gihimo pinaagi sa negosasyon o ransom.
Gidayeg ni Nigerian President Bola Tinubu ang mga response team ug miingon nga ang tanan nga mga biktima sa pagdagit kinahanglan nga luwas nga ibalik sa nasud, ingun man nga misaad usab siya nga hugtan ang seguridad aron malikayan nga mahitabo pag-usab ang ingon nga mga insidente.
Ang insidente giisip nga usa sa pinakadako nga mass kidnappings sa nasud, diin ang Christian Association of Nigeria nag-ingon nga kapin sa 300 ka mga estudyante ug 12 ka mga empleyado sa gobyerno ang gidagit, diin 50 kanila ang una nga nakalingkawas.
Gani, ang maong insidente nakapukaw sa kaylap nga kasuko sa publiko, labi na sa atubangan sa nagkadaghan nga mga pagdagit sa mga eskwelahan sa amihanang Nigeria.
Samtang, ang Estados Unidos ug Nigeria mipirma sa usa ka hiniusa nga kasabutan alang sa pagporma sa usa ka task force nga nagtumong sa pagpalig-on sa seguridad ug pagbatok sa terorismo sa nasud.
