Mikabat na sa kapin 116 ka mga tawo ang namatay, lakip ang pito ka mga bata, sa nagpadayon nga mga protesta batok sa gobyerno sa tibuok Iran, sumala sa Human Rights Activists News Agency (Hirana) nga nakabasi sa U.S.
Sumala sa datos sa HIRANA, gibana-bana nga anaa sa 2,638 ka mga tawo ang nadakpan samtang nagpadayon ang mga protesta, nga miabot na sa ika-14 nga adlaw. Samtang, 109 ka mga miyembro sa pwersa sa seguridad ang namatay sa mga protesta. May kalabotan sa nagpadayon nga kapintasan, aduna usab mga taho sa usa ka pagsira sa internet sa Iran sulod sa dul-an 60 ka oras, nga gituohan nga usa ka lakang aron mapugngan ang pagkaylap sa impormasyon ug koordinasyon sa mga nagprotesta.
Nagsugod ang mga protesta sa katapusang Domingo sa Disyembre, human ang mga lungsuranon nagmartsa sa sentro sa Tehran batok sa nagkataas nga inflation ug ang padayon nga pag-ubos sa bili sa nasudnong kwarta, ang rial.
Samtang mikaylap ang kalihukang protesta, ang mga slogan batok sa gobyerno nahimong mas klaro, lakip ang mga panawagan alang sa mga estudyante nga mahimong tingog sa katawhan ug alang sa pagpukan sa Islamic Republic.
Nanguna si Supreme Leader Ayatollah Ali Khamenei sa usa ka operasyon aron ipakatap ang rally, nga gikataho nga naglambigit sa paggamit og tear gas ug, sa pipila ka mga kaso, pagpabuto og mga pusil. Ang mga opisyal miingon nga bukas sila sa pagpamati sa mga reklamo sa ekonomiya sa mga tawo ug gibasol ang kagubot sa mga “rioters” ug giingong pagpanghilabot sa mga langyaw nga nasud, labi na ang Estados Unidos ug Israel.
Sa usa ka lahi nga pahayag, si Presidente Masuod Pezeshkian mipilit nga ang mga langyaw nga terorista nalambigit sa kagubot. Niining bahina, misaad siya nga ayohon sa gobyerno ang nagkagrabe nga mga problema sa ekonomiya sa nasud. Ang Iran nagpasidaan batok sa bisan unsang langyaw nga interbensyon.
