Kapin sa 1,000 ka OFW nga natanggong sa kagubot sa Middle East tuyo nga mopauli sa Pilipinas

Nagpahayag ang kapin sa 1,000 ka mga overseas Filipino workers (OFWs) sa ilang tuyo nga mopauli sa Pilipinas tungod sa nagkagrabe nga tensyon sa Middle East.

Sumala ni Overseas Workers Welfare Administration (OWWA) Administrator Patricia Yvonne Caunan, adunay kinatibuk-an nga 1,189 ka mga OFW gikan sa lain-laing bahin sa Middle East.

Naglakip kini sa 278 gikan sa Bahrain; 246 gikan sa Abu Dhabi; 231 gikan sa Dubai; 173 gikan sa Qatar; 62 gikan sa Kuwait; 46 gikan sa Israel ug lima gikan sa Lebanon.

Padayon usab nila nga gimonitor ang sitwasyon sa pipila ka mga Pilipino didto.

Kahinumduman nga ang Iran giatake pinaagi sa hiniusang operasyon sa US ug Israel niadtong miaging Sabado.