CEBU – Kapin sa 11,000 ka mga tinun-an sa dakbayan sa Sugbo ang nakadawat og tag-P4,000 nga balor sa financial assistance gikan sa Department of Social Welfare and Development (DSWD).
Kini ang gibutyag ni Ester Concha, pangulo sa Department of Social Welfare and Services (DSWS) sa dakbayan.
Matod ni Concha nga 11,191 ka mga tinun-an sa dakbayan sa Sugbo ang nakaparehistro sa online portal sa DSWD’s Assistance to Individuals in Crisis Situations (Aics).
Ubos sa Aics program, ang mga kabus nga mga tinun-an sa elementarya hatagan og P1,000; high school students, P2,000; senior high school students, P3,000; ug mga estudyante sa kolehiyo o bokasyonal, P4,000.
Kung diin ang inisyal nga 4,417 ka mga tinun-an nga nakadawat sa cash assistance gikan sa Barangay Basak Pardo, Buhisan, Calamba, Guadalupe, Kalunasan, Labangon, Poblacion Pardo, Punta Princesa, Quiot, San Nicolas Proper ug Tisa.
Matod ni Concha nga ang mga estudyante nga nagproseso sa ilang online registration alang sa Aics ipahibalo pinaagi sa email o text message kon sila kwalipikado isip benepisyaryo.
