Gipahibalo sa Department of Energy (DOE) nga ang nasud nakadaginot og halos 145.43 megawatts nga enerhiya tungod sa pag-apil sa Earth Hour nga nagsugod gikan sa alas 8:30 sa gabii hangtod alas 9:30 sa gabii niadtong Sabado, Marso 28.
Sa usa ka pahayag, ang DOE miingon nga basi sa ilang datos, kadaghanan sa Luzon nakadaginot og halos 75.25 MW nga enerhiya, 66.6 MW sa Visayas ug 3.58 MW ang natala sa Mindanao.
Gihimug-atan ni Energy Secretary Sharon Garin, ang pag-apil sa mga Pilipino sa tinuig nga Earth Hour nagpasabot lamang nga ang nasud makakab-ot og dakong pagkunhod sa konsumo sa enerhiya.
Miingon usab siya nga kini usa lamang ka pahinumdom nga ang pagdaginot sa enerhiya dili lamang gipatuman sulod sa usa ka oras apan gihimo sa adlaw-adlaw nga mga kalihokan.
Samtang, ang Energy Department nanawagan sa publiko nga ipadayon ang Earth Hour dili lamang isip usa ka tinuig nga obserbasyon pinaagi sa pagpatuman sa mga pamaagi sa pagdaginot sa enerhiya ug bisan sa trabaho.
