-- ADVERTISEMENT --
INDIA-Nakadawat og bomb threat ang kapin sa 40 ka mga eskwelahan sa nasudnong kapital sa India nga Delhi pinaagi sa e-mail gahapong adlawa, Disyembre 9.
Diin ang mga tunghaan nga nakadawat sa hulga sa bomba naglakip sa Delhi Public School nga nahimutang sa RK Puram ug GD Goenka School sa Paschim Vihar sa sayo sa buntag.
Sumala sa Delhi Police, nga ang uslod sa email kay nagtanom kini og daghang bomba sa mga building sa eskwelahan, ingon man nga gagmay kini ug gitago pag-ayo ug gani dili kini makagrabe og kadaot sa mga edipisyo apan makaangol kini sa mga estudyante ug magtutudlo.
Gisusi na sa kapulisan sa Delhi ang IP address sa nagpadala sa maong email ug gipabalik sa ilang mga balay ang mga tinun-an.
