Moabot sa 4,806 ka mga pasahero, drayber, ug mga katabang ang na-stranded karon sa 103 ka mga pantalan sa nagkalain-laing rehiyon sa nasud tungod sa dili maayong panahon nga gipahinabo sa Bagyong Uwan, sumala sa usa ka report sa Philippine Coast Guard (PCG) niadtong Lunes, Nobyembre 10.
Base sa Maritime Safety Advisory sa PCG, ang paglihok sa mga barko sa dagat sa pipila ka mga rehiyon kay temporaryo nga gisuspinde tungod sa kusog nga hangin ug balud sa dagat.
Ang mga apektadong rehiyon naglakip sa Central Luzon, Southern Tagalog, Bicol, Central Visayas, Eastern Visayas, Western Visayas, Northern Mindanao, Northeastern Mindanao, ug Southern Visayas.
Sumala sa PCG, 2,222 ka rolling cargoes, 44 ka mga barko, ug 20 ka motorbanca ang na-stranded, samtang 392 ka mga barko ug 123 ka motorbanca ang natanggong.
Ang Bicol Region ang pinakagrabe nga naapektuhan, nga adunay 2,589 ka mga pasahero ug 1,145 ka rolling cargoes nga dili makabiyahe. Gisundan kini sa Eastern Visayas nga adunay 935 ka na-stranded nga mga pasahero, ug Southern Tagalog nga adunay 744 ka mga pasahero.
Sa Central Luzon, 100 ka mga pasahero ug 25 ka rolling cargoes ang na-stranded, samtang sa Northern Mindanao, 216 ka mga pasahero ug 18 ka rolling cargoes ang naapektuhan sa mga pantalan sa Cagayan de Oro, Tagoloan, ug Ozamiz.
