Gibutyag sa Bureau of Immigration (BI) ang sobra nga paggamit sa backdoor channel sa nasod bahin sa human trafficking.
Matud ni BI Deputy Spokesperson Melvin Mabulak, dul-an 50% sa mga Filipino angnabiktima sa human trafficking series nga nakabalik na sa nasud ang kumpirmadong naggamit sa backdoor channels.
Ingon man nga mao kini ang usa sa mga hagit sa buhatan sa BI
tungod kay ang Pilipinas adunay lapad nga kabaybayonan diin ang tanan kinahanglan nga bantayan aron mahunong dayon ang mga sindikato nga mosuway sa pagbiyahe sa mga biktima sa trafficking gikan sa Pilipinas ngadto sa ubang kanasuran.
Matod ni Mabulak, gihangyo sa BI ang Philippine Coast Guard nga hugtan ang pagpatrolya sa kadagatan ilabi na sa mga lugar nga mahimong taytayan sa ubang kanasuran.
Samtang, ang ubang mga biktima sa human trafficking nga wala ipadala pinaagi sa backdoor channels nakit-an usab nga adunay maayong mga profile sa pagbiyahe.
Gipasabot ni Mabulak nga nakabiyahe na sila kaniadto sa lain-laing mga nasud isip trabahante o turista, busa dili kaayo kuwestiyonable ang ilang profile ilabi na sa immigration counter.
Tungod sa maong problema, halos kada adlaw nag-endorso ang BI sa Inter-Agency Task Force against Trafficking alang sa tukmang imbestigasyon.
Gihatagan usab og gibug-aton sa opisyal nga kabahin sa human trafficking system sa nasud tungod sa recruitment sa social media, busa gikinahanglan ang dinaliang pagmonitor sa mga site sa nagkalain-laing ahensya.
