CEBU CITY-Nakatala ang Cebu Port Authority (CPA) og 51,000 ka mga pasahero nga midagsa ug milarga sa mga pantalan sa Sugbo kagahapong adlawa, Oktubre 28, 2023.
Mao kini ang gibutyag ni Mary Knoll Bolasa, ang tigpamaba sa CPA.
Matod niini nga mas daghan sila og natala nga pasahero karung tuiga kung itandi sa ihap sa mga pasahero nga ilahang natala sa milabay nga tuig, sa susamang higayon.
Gibutyag niini nga sa milabay nga tuig 2022, nakatala lamang sila og 6,000 ka mga pasahero.
Gidugang sa opisyal nga ang pagdasok sa mga pasahero sa mga pantalan sa Sugbo kay gumikan sa nakalinyang mga dagkong kalihukan karung semanaha, sama nalang sa Barangay at Sangguniang Kabataan Election (BSKE) 2023 ug ingon man sa umaabot adlaw sa mga santos og patay sa Nobyembre 1 ug 2.
Sumala sa nalikom nga datus sa CPA nga mokabat ngadto sa kapin sa 20,000 ka mga passenger arrivals ang ilahang natala.
Samtang, kapin sa 31,000 ka mga pasahero ang natala nga mibyahe ngadto sa ilahang tagsa-tagsa ka mga probinsya gikan sa Sugbo.
Hinuon walay natala nga bisan unsang matang sa kakulian ang mga kadagkoan sa CPA gikan sa mga nagkadaiyang pantalan sa Sugbo.
Gibutyag usab ni Bolasa nga wala silay nadawat nga mga taho nga adunay mga pasahero nga nailad sa mga scalpers sukad sa milabay nga Biyernes, Oktubre 7, 2023.
