CEBU CITY-Misugat sa Valentine’s Day ang miulbong sunog sa Dimasalang St. Brgy. Pahina Central, dakbayan sa Sugbo diin dili mominos sa P6 milyones nga kantidad sa mga kabtangan ang nahimong danyos, lakip na ang mga sakyanan ug motorsiklo nga nakaparking sa maong area.
Ingon man nga nabulabog ang mga tinun-an sa Cebu Eastern College gumikan sa dali nga pagkatag sa sunog sa atubangan mismo sa eskwelahan.
Gani, wala’y natala nga naangol ug nakalasan apan anaa sa 37 ka mga panimalay ang gikaon sa sunog diin 35 niini ang hingpit nga naugdaw.
Sa pagkakaron, dili pa mabutyag sa mga opisyal ang hinungdan gumikan padayon pa sa gihapon ang ilang imbistigasyon lakip na ang pagtan-aw sa tanang anggulo nga possibleng tinubdan sa dakong sunog.
Sa pikas bahin, hingpit nga mipahinumdom si Senior Fire Officer 2 Wendell Villanueva, ang tigpamaba sa Cebu City Fire Office sa publiko nga magbinantayon sa tagsa-tagsa ka mga panimalay ug uban pang posibleng mamahimong hinungdan sa sunog.
Gani, gi-awhag niini ang tanan nga mosalmot sa ilang umaabot nga mga kalihokan alang malikayan ang mga moulbong sunog hilabi na nga anaa na sa tunga-tunga sa buwan sa Pebrero.
