Gipasalig sa Land Transportation Franchising and Regulatory Board (LTFRB) ang mas paspas ug mas padayon nga pag-apod-apod sa fuel subsidy human gikumpirmar nga kapin sa P651 milyon gikan sa kinatibuk-ang P2.5 bilyon nga pondo ang naapod-apod na sa mga driver ug operator sa public utility vehicle (PUV) sa tibuok nasud.
Kini ang bag-ong anggulo sa ahensya human giangkon nga adunay pipila ka mga pagkalangan sa unang hugna sa pag-apod-apod nga nagsugod niadtong Marso 25.
Sa usa ka pahayag, gimandoan ni LTFRB Chairperson Atty. Vigor Mendoza II ang tanan nilang mga regional director nga sigurohon ang paspas, hapsay, ug walay hasol nga paghatud sa nahisgutang cash assistance.
Diin basi sa datos sa ahensya, gikan sa kinatibuk-ang P651,185,000 nga naapod-apod, ang pinakadako nga kantidad sa pondo sa Metro Manila nga nakadawat og P181.2 milyon.
Gisundan kini sa CALABARZON nga adunay P98.2 milyon, ug Central Luzon nga nakakuha og P73.4 milyon.
Masaligon ang liderato sa LTFRB nga ang programa mapadali sa umaabot nga mga adlaw aron matabangan ang sektor sa transportasyon.
Ang ayuda naglakip sa mga drayber ug operator sa tradisyonal ug modernong mga jeepney, UV Express, mga bus nga pangpasahero ug point-to-point, mga kauban sa Transport Network Vehicle Service (TNVS), mga Filcab, mga taxi, mga tricycle, ug bisan ang mga serbisyo sa paghatud.
