CENTRAL VISAYAS-Kapin sa tunga sa milyon sa kinatibuk-an nga financial assistance ang nahatag sa Department of Social Welfare and Development (DSWD-7) alang sa mga survivor ug biktima sa insidente sa pagpamusil sa Pamplona, Negros Oriental diin gikamatay usab ni Negros Oriental Governor Roel Degamo.
Gipahibalo sa naasoy nga ahensya nga anaa sa P513,224.00 nga hinabang pinansyal ang ilahang nahatag sa 21 ka mga survivors ug walo ka namatyan nga pamilya.
Matud pa, nag-agi una sa beripikasyon sa mga hingtungdan nga local government units (LGUs) ug DSWD 7 ang mga apektado sa maong insidente una nga nahatag sa naasoy nga hinabang pinansyal.
Sa naasoy nga kantidad, ang DSWD-7 mihatag ug P250,000 cash assistance alang sa mga support services, P90,000 cash alang sa food assistance, lain pa nga P80,000 alang sa burial assistance, ug P53,750 alang sa medical assistance.
Samtang, ang field office mihatag usab ug family food packs nga nagkantidad ug P28,474 ug P11,000 alang sa educational assistance.
