CENTRAL VISAYAS-Mapasalamaton si Herman Z. Basbaño, ang national president sa Kapisanan ng mga Brodkaster ng Pilipinas, ngadto kang Pamplona Mayor Janice Degamo sa pagtuo nga dako ang papel sa media sa pagsulbad sa kamatayon sa iyahang bana nga si Negros Oriental Governor Roel Degamo.
Gi-uyonan niini ang pamahayag ni Mayor Janice nga usa sa trabaho sa media ang pagbutyag sa kamatuoran, ingon man ang pagtuki sa ti-unay nga gibuhat sa mga otoridad ug sa gobyerno sa pagkab-ot sa insakto nga hustisya alang sa mga biktima sa bisan unsa man nga klasi sa kapintasan.
Matud ni Basbaño nga isip “fourth estate” sa gobyerno, dako ang papel nga gihuptan sa media sa pagpaabot sa katawhan sa tinuod nga mga panghitabo ilabi na sa mga kapintasan o mga pagpamatay sa Negros Oriental.
Gawas sa Negros Oriental, gitino sa KBP national president, nga ang pagbutyag sa kamatuoran kay dili lang alang sa kaso sa pagpatay ni Governor Degamo, inay sa tanang panghitabo dili lang sa naasoy nga probinsiya, apil na ang ubang dapit sa Pilipinas.
